Денес на Светскиот ден за борба против ракот, Здружение ЕСЕ бара да се зголеми опфатот на жените со Програмите за скрининг (рано откривање) на ракот на грлото на матката и ракот на дојката, на Министерството за здравство.

Напоменуваме дека во 2020 година само 5,6% од жените од целната возрасна група биле опфатени со скрининг на рак на грлото на матката. Додека во истата година со скрининг на рак на дојка се опфатени поразителни 0,3% од жените на возраст од 50 до 69 години.

Состојбите се уште понеповолни помеѓу жените Ромки, односно во периодот од 2012 до 2019 година, само 16% од жените Ромки на возраст од 24 до 60 години биле опфатени со скрининг на рак на грлото на матката. Во истиот период (2012 – 2019) со скринингот биле опфатени 28% од жените на национално ниво.  ,

Светскиот ден за борба против ракот се одбележува секоја година на 04-ти февруари, како иницијатива на Меѓународната унија за контрола на ракот . Мотото на Светскиот ден за 2022 година е „Да го затвориме јазот во пристапот до здравствената заштита.

Кампањата на Светскиот ден за борба против ракот во 2022 година се однесува на разбирањето и препознавањето дека постојат нееднаквости во пристапот до здравствена заштита на светско ниво. Потребно е отворено да погледнеме на предизвиците и да ги погледнеме овие потврдени факти:

• Нееднаквоста во пристапот до здравствена заштита за карциноми чини животи
• Луѓето кои бараат здравствена заштита поврзана со карцином се соочуваат со бариери на секој чекор
• Финансискиот приход, образованието, местото на живеење и дискриминацијата по однос на етничка припадност, род, сексуална ориентација, возраст, попреченост се само некои од факторите кои можат негативно да влијаат врз пристапот до здравствена заштита
• Недостатоците ги засегаат сите, вклучувајќи ве и вас и вашите сакани
• Овие бариери не се запишани во камен. Тие можат и мораат да бидат променети.