Центарот за правна помош при Здружението ЕСЕ ги информира граѓаните по однос на новите владини одлуки и Уредби со законска сила,со важност од 23.04.2020, кои се во насока на релаксирање на рестриктивните мерки во слободното движење на граѓаните истовремено и со мерки за постепено економско заживување на стопанството.
Поточно, за време на вонредната состојба се намалува ограничувањето на движењето односно забраната за движење за време на работните денови ќе почнува од 19.00 часот и ќе трае се до 05.00 часот наутро, додека пак за време на викендите ќе почнува од 15.00 часот сабота и ќе трае до понеделник до 05:00 часот наутро. Со оваа одлука, лицата над 67 годишна возраст ќе им биде дозволено движење во работните денови од 05:00 часот наутро до 12:00 часот на пладне а додека пак младите лица до 18 години ќе можат да излегуваат од 13:00 часот до 19:00 часот. Во сабота, на лицата над 67 години им се дозволува движење од 05:00 часот наутро до 11:00 часот а на младите лица до 18 години ќе можат да излегуваат од 12:00 часот до 15:00 часот.
Стапи во сила и новата Уредба со законска сила за задолжително носење лична заштитна опрема на лицето за секој граѓанин на територија на РСМ. Тоа значи дека секој граѓанин при излегувањето надвор од домот и при движење на јавни места од отворен и затворен тип како што е јавен превоз, маркети, банки, пошти и слично, задолжително мора да носи лична заштита како маска, шал или марама со која ќе го прекрие делот на устата и носот. Со уредбата се утврдува и исклучок од обврската од носење лична заштита на лицето и тоа кога се патува со сопствено патничко возило со членови од семејството, престој во двор од семејна куќа, индивидуални активности како возење велосипед или за време на прошетка со запазување на минималното растојание од два метри со други лица.
Истовремено, со новите уредби со законска сила се задолжуваат и сите правни лица и институции, како банки, пошти, маркети и слично, да обезбедат лична заштитна опрема за своите вработени како и своја редарска служба која ќе врши надзор и контрола на задолжително носење заштитна опрема на лицето кај граѓаните при влез во нивните простории притоа со запазување на ознаките за движење и минималното растојание од два метри во просториите во кои граѓаните ги добиваат нивните услуги.
За непочитување на одлуките за задолжителна лична заштитна опрема на лицата, предвидени се казни и за физичките и за правните лица. Со тоа што граѓаните за ваквиот прекршок, од страна на надлежните органи ќе бидат опоменувани до 30 април 2020 година а по истекот на овој период за не носење лична заштита на лицето согласно уредбата предвидени се глоби во износ од 20 евра во денарска противвредност. Доколку правните лица не постапуваат согласно одлуката за задолжително обезбедување и носење лична заштитна опрема на лицето за своите вработени и корисници на услуги за ваквиот прекршок е утврдена глоба во износ од 2.000 евра во денарска противвредност а износ од 1.000 евра во денарска противвредност за одговорното лице во правното лице.
Новите уредби со законска сила се во насока на зголемена обврска за здравствена заштита на граѓаните имајќи во предвид дека се уште не е елиминирана опасноста од ширење на коронавирусот. Секое непочитување на граѓаните на овие одлуки и уредби не само што е парично казниво туку забрана од редарските служби во правните лица во обид да ги користат нивните услуги доколку не носат заштитна опрема на лицето.
За сите оние на кои им се потребни дополнителни информации, Ве молиме обратете се на контакт телефонот 071 266 101 на Центарот за правна помош на ЕСЕ.
