Во рамките на иницијативата „Човекови права во здравствена заштита“ реализирана од страна на Здружението за еманципација, солидарност и еднаквост на жените на РМ – ЕСЕ и финансиски поддржана од Фондациите отворено општество од Њујорк и Фондацијата отворено општество – Македонија, во периодот 22-23 јуни (сабота - недела) во хотел „Арка“, Скопје, ќе се одржи дводневна обука на тема „Човекови права во здравствена заштита“.

Претстојната обука претставува продолжение на нашите досегашни заеднички заложби и работа во насока на унапредување на состојбите по однос на спроведувањето на правото на здравје преку вклучување и мобилизирање на поширок круг на граѓански организации кои претставуваат здруженија на пациенти од различни заболувања. На обуката ќе присуствуваат претставници од Министерството за здравство, Републички санитарен и здравствен инспекторат и претставник од Комисијата за заштита на права на пациенти.

Досега, во рамки на оваа иницијатива презедовме активности во насока на зголемување на свесноста и запознавање на практичарите (правници, здравствени работници и соработници), пациенти и претставници на граѓанските организации за заштита на правото на здравје. Истовремено работевме и во насока на зајакнување на соработката на сите заинтересирани страни со цел создавање на можности за преземање и иницирање на случаи за заштита на правото на здравје. Плод на заедничката соработка претставува и подготовката на заеднички извештај за спроведување на правото на здравје кај повеќе ранливи групи на пациенти во рамки на механизмот (УПР – Универзален периодичен преглед), кој ќе биде доставен до Советот за човекови права при ОН.