Губиме по 20 евра годишно за пензија
За пет месеци минатата година, идните пензионери изгубија 1,5 милиони евра од нивните сметки. Парите отидоа во државниот пензиски фонд, зашто Министерството за труд и социјална политика го намали процентот кој од пензискиот придонес оди на личните сметки на осигурениците во вториот пензиски столб.
Во првиот квартал од годинава, пак, државниот ПИОМ по овој основ добил дополнителни 800.000 евра. Или пресметано поединечно, уплатите секоја месец на личните сметки на осигурениците во вториот столб се скусени за 4,8% или, во просек, по 90 денари.
"Намалувањето на стапката на придонес која се одвојува за членовите на задолжителните пензиски фондови, има дирекно влијание врз износот на средства на индивидуалните сметки на членовите, и оттука директно влијание врз износот на нивната пензија", вели Јанко Тренкоски, директор на КБ Прво пензиско друштво. "Вториот пензиски столб не се базира на меѓугенерациска солидарност (како што е првиот столб), односно, во рамките на вториот столб, секое лице што е член на некој од задолжителните пензиски фондови, делот од придонесот кој го уплатува од својата плата, го уплаќа директно за своја пензија, односно средствата се евидентираат на лична сметка. Оттука секое намалување на уплатата, значи намалување и на идната пензија", смета Тренкоски.
Со промена на законската регулатива, наместо 6,3% за вториот задолжителен фонд се одвојува 6%. Новата распределба на парите стартуваше од август минатата година, со образложение дека кога во иднина ќе се намалува процентот на пензиските давачки, од 18% колку што е сега на 15%, делот кој ќе оди во приватните фондови засекогаш ќе остане фиксиран на 6%.
Но државата не ги намали социјалните давачки, како што најави пред неколку години, а парите не им ги врати на осигурениците. Тие сега одат за исплата на сегашните пензионери.
Тренкоски вели дека можеби намалувањето ќе предизвика поголем економски раст и со тоа и поголеми плати во иднина. Така, оваа мерка можеби ќе ги зголеми идните пензии, наместо тоа што го кажува краткорочниот негативен ефект.
Извор: Вест